რეკომენდაციები ნარკოტიკების მომხმარებლებს COVID-19 კორონავირუსის შესახებ

რეკომენდაციების მიზანია ნარკოტიკების მომხმარებელთა ინფორმირება კორონავირუსის შესახებ და ზიანის შემცირების რჩევების გაზიარება. გაავრცელეთ ინფორმაცია თემში ფართოდ, გაუფრთხილდეთ ერთმანეთს.

არ გააზიაროთ ნებისმიერი ნარკოტიკის მისაღებად გამოყენებული ნებისმიერი ინსტრუმენტი (მილი, ბონგი, ვეიპი ან ჯოინთი, საინექციო ინსტრუმენტები) საინექციო წყლის ჩათვლით. ნებისმიერი ინსტრუმენტის (საინექციო თუ არასაინექციო) გაზიარებით იზრდება კორონავირუსით (COVID-19) ინფიცირების რისკიც.
გაითვალისწინეთ, რომ ოპოიოდების მომხმარებლებს აქვთ სიკვდილიანობის გაზრდილი რისკი COVID-19-ით ინფიცირებისას. ამიტომ აუცილებელია მაქსიმალური სიფრთხილის გამოჩენა ინფექციის პრევენციის მიზნით.
თუ ხართ ოპიოიდების ჩანაცვლებით თერაპიაზე, შეეცადეთ ექიმს სთხოვოთ რამდენიმე დღის დოზა მაინც გამოგატანოთ სახლში, ჩანაცვლებით ცენტრში ყოველდღიური ვიზიტების თავიდან ასარიდებლად.
შეემზადეთ, რომ შეიძლება მოგიწიოთ არა ნებაყოფლობითი აბსტინენცია (ნარკოტიკების მოხმარებისგან თავის შეკავება) ნარკოტიკების ბაზარზე მოწოდების შეფერხების გამო; ამიტომ ყველანაირი სიტუაციისთვის იყავით მზად. მოიმარაგეთ წყალი, საკვები და ისეთი წამლები, რომლებიც დაგეხმარებათ გადააგოროთ რთული (ლომკის) პერიოდი. ოპიატებისგან დოზის თანდათან კლებით დეტოქსიკაციის ჩატარება ერთგვარი გამოსავალია. იგივე მიდგომა შეიძლება გამოიყენოთ სხვა ნებისმიერ ნარკოტიკთან მიმართებაში.
მოიმარაგეთ სტერილური საინექციო აღჭურვილობა, რომელიც მინიმუმ 3-4 კვირა მაინც გეყოფათ - შესაძლოა მათზე ხელმისაწვდომობა შემცირდებს ვირუსის ფართო გავრცელების და საგანგებო მდგომარეობის გამოცხადების შემდეგ.
დილერისგან აღებული წამალი ან დაგდებული შეფუთვა, ნებისმიერი სახით როგორადაც მიიღებთ დოზას, შესაძლოა დაინფიცირებული იყოს ვირუსით. ამიტომ, შეეცადეთ ჯერ პაკეტი გაასუფთაოთ სპირტიანი ტამპონით ან ბამბით. ნუ გახსნით ნარკოტიკის დაფასოებულ შეკვრას კბილებით! არასდროს იცით, ვის ხელში იყო ეს შეკვრა, სანამ თქვენთან მოხვდებოდა.
ხელების და საგნების დასამუშავებლად გამოიყენეთ მინიმუმ 60% სპირტის ხსნარი (ვირუსი ადვილად კვდება ამ კონცენტრაციის სპირტის ზემოქმედებით), უფრო მაღალი კონცენტრაციის სპირტის ხსნარის გამოყენება არ არის საჭირო. თუ გაქვთ 100მლ-იანი 95%-იანი სამედიცინო სპირტი (ეთანოლი), დაამატეთ 30მლ გამოხდილი ან გადადუღებული და შემდეგ გაცივებული წყალი.
დაიბანეთ ხელები საპნით და ცხელი წყლით ძალიან კარგად, მინიმუმ 20 წამის განმავლობაში, რაც უფრო დიდხანს დაიბანთ, უკეთესია და რაც მთავარია დაიბანეთ ყოველ ჯერზე, როცა კონტაქტი გექნებათ სხვა ადამიანებთან, ჩამოართმევთ ხელს, გამოართმევთ ნარკოტიკს ან ფულთან გექნებათ კონტაქტი. უფრო მეტი ინტენსივობით გამოიყენეთ სპირტიანი ტამპონები, დაამუშავეთ ყველა ნივთი, რასაც ეხებით ნარკოტიკის მომზადების ან მოხმარებისას და ნუ მისცემთ სხვას უფლებას შეეხოს თქვენს ნივთებს, ნურც თქვენ შეეხებით სხვისას. თავად მოამზადეთ ყველაფერი, საკუთარი სუფთა ხელებით.
ეცადეთ ხელებით არ შეეხოთ სახეს, თვალებს, პირის ღრუს, ვინაიდან ვირუსი ზედაპირზე რამდენიმე საათი ძლებს და შესაძლოა არასუფთა ხელიდან იოლად დაინფიცირება. გამოიყენეთ ქაღალდის ხელსახოცები სველი ხელების გასამშრალებლად, ან სუფთა პირსახოცი, რომელსაც თქვენს გარდა არავინ გამოიყენებს.
თუკი გაქვთ რომელიმე სიმპტომი, რომელიც COVID-19-ს ახასიათებს (ტემპერატურა, ყელის ტკივილი, ცხვირიდან გამონადენი, ხველება, კუჭის აშლა, სუნთქვის გაძნელება) ნუ შეხვდებით მეგობრებს და ნუ მიხვალთ ზიანის შემცირების ცენტრში, მათ სთხოვეთ, რომ მოგიტანონ შპრიცები და ნემსები თავად.
გახსოვდეთ, რომ ადამიანებს, რომლებსაც აქვთ დაბალი იმუნიტეტი (ორსულები, მოხუცები, სიმსივნის მქონეები და სხვა), ფილტვების დაავადებები ან სხვა რაიმე ქრონიკული მდგომარეობა, COVID19–ით ინფიცირების მომატებული რისკის წინაშე იმყოფებიან და მიეხმარეთ, იმით, რომ თავად არ დაინფიცირდეთ და არ გადასდოთ. დარჩით უსაფრთხოდ და ჯანმრთელად, გაითვალისწინეთ ზიანის შემცირების რჩევები.